नयाँ आर्थिक वर्ष अर्थात १ साउन आइतबारदेखि लागू हुने गरी शिक्षा, स्वास्थ्य तथा अन्य शाखाहरुमा कार्यरत करार कर्मचारी कटौती गरिएको छ । महोत्तरीको बर्दिबास, जलेश्वर र औरही नगरपालिकाका साथै अन्य स्थानीय तहहरुबाट करार कर्मचारी कटौती हुनेछन् ।
जिल्लाको जलेश्वर नगरपालिकाले पनि करारका कर्मचारी हटाउने विहिवार नै निर्णय गरेको नगरप्रमुख सुरेश साह सोनारले जानकारी दिए ।
बर्दिवास नगरपालिकामा माओवादीवाट निर्वाचित जनप्रतिनिधिले करार कर्मचारी हटाउने निर्णय गलत भएको भन्दै विरोध जनाएका छन् ।
महोत्तरीको गौशाला नगरपालिकाले भने तत्काल करार कर्मचारी कटौती नगर्ने भएको छ । गौशाला नगरमा झण्डै १ सय कर्मचारी करारमा कार्यरत छन् ।
महोत्तरीको पालिकाहरुको यस्तो निर्णयसँगै देशका अन्य पालिकाहरुमा पनि पूर्व जनप्रतिनिधिले नियुक्त गरेका करार कर्मचारी हटाएर आफ्नो मातहतको कर्मचारी नियुक्त गर्नुपर्ने बहस थालेका छन् ।