न्यायाधीश जगदीश घिमिरेको एकल इजलासमा तीनवटै रिटमाथिको सुनुवाइपछि कारण देखाउ आदेशसहित अन्तरिम आदेश जारी भएको हो । ती तीनवटै क्याम्पसमा सत्तागठबन्धनका विद्यार्थीहरुले तालाबन्दी गरेका कारण निर्वाचन स्थगन भएको छ ।
नेपाल कमर्स क्याम्पसको हकमा निर्वाचन अधिकृत नै फरार भएपछि मतदानमा लाइन बसेका विद्यार्थीहरु समेत फर्किएका थिए भने मतपत्र च्यात्ने नेविसंघका तीन विद्यार्थी पक्राउ परेका थिए ।
मंगलवार उच्च अदालतमा तीन वटै क्याम्पसमा निर्वाचन माग गर्दै परेको रिट निवेदकको माग बमोजिम अन्तरिम आदेश दिएको हो । रत्नराज्य क्याम्पसका एम ए प्रथम सेमेस्टरका विद्यार्थी मदन भण्डारीले रिट दायर गरेका थिए ।
त्यस्तै पाटन संयुक्त क्याम्पसका एमबीएस तेस्रो सेमेस्टरका सुरेश जिसी र नेपाल कमर्स क्याम्पसका दिवस सापकोटाले रिट दायर गरेका थिए । तीमध्ये भण्डारी र जिसी अनेरास्ववियुबाट आर आर तथा पाटनका अध्यक्ष पदका उम्मेदवार हुन् भने सापकोटा नेपाल कमर्स क्याम्पसका सचिव पदका उम्मेदवार हुन् ।
