काठमाडौं उपत्यका प्रहरी कार्यालयबाट खटिएको टोलीले मंगलबार राति सो कारखाना फेला पारेको हो । न्यूरोडस्थित एक घरमा सुन कारखाना फेला परेको र त्यसका सञ्चालकलाई नियन्त्रणमा लिई अनुसन्धान थालिएको प्रहरी स्रोतले आर्थिकन्यूजलाई जानकारी दिएको छ ।
प्रहरी स्रोतले सो कारखानाबाट ठूलो परिमाणमा सुन पनि बरामद भएको जानकारी दिएको छ । केही गालेर बिस्कुट बनाइएको र केही किलो विदेशबाट गहनाका रूपमा ल्याइएको सुन फेला पारेको भनिएको छ । न्यूरोडमा त्यसरी गालेको सुन तस्कर समूहले भारत पु¥याउने गरेको पाइएको छ ।
सुन गाल्ने कारखानामा छापा हानेसँगै सत्तारुढ माओवादीका नेताहरूले अनुसन्धान प्रकृयामा दख्खल दिन थालेको प्रहरी स्रोतले जानकारी दिएको छ ।
छापा मारेर झण्डै ८ किलो सुन बरामद गरेको छ ।
उपत्यका अपराध अनुसन्धान कार्यालय, बानेश्वरको टोलीले मंगलबार राति ७ किलो ८ सय ग्राम सुनसहित ‘ओमपाल गोल्ड शप’ का सञ्चालक पदमप्रसाद पाण्डेलाई पक्राउ गरेको एसएसपी सोमेन्द्रसिंह राठौरले बताए ।
पाण्डेले तस्करीको सुन गालेर गहना बनाएर बेच्ने गरेको सूचना प्रहरीले पाएको थियो । त्यसको आधारमा पुगेको प्रहरी टोलीले छापा मारेर सुन बरामद गरेको हो । केही सुन ढिक्कामा छन् भने केही गहना समेत प्रहरीले बरामद गरेको बताइएको छ ।
यसअघि प्रहरीले ३ साउनमा त्रिभुवन अन्तर्राष्ट्रिय विमानस्थलको भन्सार जाँच पार गरेर बाहिरिएको ६० किलो सुन बरामद गरेको थियो । त्यसअघि विद्युतीय सिगरेट (भेप) मा लुकाएर समेत ९ किलो सुन तस्करी भएको थियो ।
