उप–आयोजना–२ बाट काठमाडौंको सुन्दरीजलस्थित खानेपानी प्रशोधन केन्दमा प्रशोधित मेलम्चीको खानेपानी उक्त केन्द्रबाट काठमाडौंका विभिन्न नौ स्थानमा रहेका १० वटा खानेपानी ट्याङ्कीहरूमा आपूर्तिका लागि बिच्छइएका थोक वितरण प्रणाली (बिडिएस) का ४०० मि.मि. देखि १,४०० मि.मि. ब्याससम्मका ठूला डक्टाइल आइरन (डिआई) पाइपलाइन र निर्माण गरिएका संरचना तथा ट्याङ्कीहरूको स्वामित्व बोर्डलाई हस्तान्तरण गरिएको हो ।
काठमाडौंमा यही माघ १६ गते आयोजित कार्यक्रममा आयोजना कार्यान्वयन निर्देशनालय, काठमाडौं उपत्यका खानेपानी व्यवस्थापन बोर्ड र काठमाडौं उपत्यका खानेपानी लिमिटेड (केयुकेएल) बीच थोक वितरण प्रणाली, संरचना र पानी ट्याङ्कीहरूको स्वामित्व हस्तान्तरण सम्बन्धमा सम्झौता भएको हो ।
खानेपानी मन्त्रालयका सहसचिव त्रिरेश प्रसाद खत्रीको उपस्थितिमा उक्त सम्झौतापत्रमा आयोजना निर्देशक राजेन्द्र सापकोटा, बोर्डका कार्यकारी निर्देशक सञ्जीव विक्रम राणा र केयुकेएलका उपप्रमुख कार्यकारी अधिकृत ज्ञानेन्द्र बहादुर कार्कीले हस्ताक्षर गरे । सो अवसरमा आयोजना निर्देशक सापकोटाले थोक वितरण प्रणालीका संचालन निर्देशिका, जगेडा पाइप तथा फिटिङ्स, दुईवटा सवारीसाधन, थोक वितरण प्रणालीको नक्सा, जिआईएस नक्सा र परीक्षण प्रमाणपत्र बोर्डलाई हस्तान्तरण गरेका हुन ।
आयोजना कार्यान्वयन निर्देशनालयबाट स्वामित्व लिएपश्चात बोर्डले तत्कालै शुरू हुनेगरी थोक वितरण प्रणालीको संचालन, मर्मत सम्भार र खानेपानीको गुणस्तर कायम गर्ने कार्यको जिम्मा केयुकेएलले दिने व्यवस्था रहेको छ ।
