लगातारको वर्षापछि अछामको कमलबजार नगरपालिका र तुर्माखाँद गाउँपालिका ५ काँडामा बाढीले घर पुरिँदा चार जनाको मृत्यु भएको छ । अन्य १२ जना बेपत्ता भएको प्रहरीले जनाएको छ ।
यस्तै, अविरल वर्षाका कारण पूर्वी कैलालीमा झण्डै ६ सय घर डुबानमा परेका छन् । कान्द्रा र पथरिया नदीको बाढी बस्तीमा पस्दा पाँच सय बढी घर डुबानमा परेको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले जानकारी दिए ।
भीमदत्त राजमार्ग अवरुद्ध
वर्षाका कारण पहिरो जाँदा भीमदत्त राजमार्ग अवरुद्ध भएको छ । कैलालीको चुरे गाउँपालिका ६ बालकोटमा भीमदत्त राजमार्ग अवरुद्ध भएको हो ।
सडक अवरुद्ध भएका कारण सवारी साधनहरु अलपत्र परेको जिल्ला प्रहरी कार्यालय कैलालीले बताएको छ ।
