सामुदायिक विद्यालयमा सम्बन्धित विद्यालयका अभिभावकहरुलाई बढी जिम्मेवार बनाइ विद्यालय ब्यवस्थापन समिति गठन गर्न राज्य संयन्त्रले सहयोग गर्नुपर्नेमा जनप्रतिनिधिलाई अध्यक्ष बनाउने काम गरी शिक्षा क्षेत्रमा अन्योलताको वातारवरण सिर्जना गरेको भन्दै संघले गम्भीर ध्यानाकर्षण भएको जनाएको छ ।
संघका अध्यक्ष कोषबहादुर जिसीले प्रेस विज्ञप्ति जारी गर्दै शिक्षण संस्थामा गरिने राजनीतिक हस्तक्षेपको कार्यलाई अबिलम्ब अन्त्य गरी विद्यालय ब्यवस्थापन समितिमा वास्तविक अभिभावकको प्रतिनिधित्व गराई विद्यालयलाई स्वच्छ रुपले चल्ने वातावरण सिर्जना गर्न सरकारसँग अपिल गरेका छन् । पछिल्लो समय सामुदायिक विद्यालयहरुमा स्थानीय जनप्रतिनिधिहरु नै ब्यवथापन समितिको अध्यक्ष बनाउने काम भएका छन् ।
काठमाडौं महानगरपालिकाले पनि सबै सामुदायिक विद्यालयको ब्यवस्थापन समिति खारेज गर्दै वडा अध्यक्षहरुलाई नै ब्यवस्थापन समितिको अध्यक्ष बनाएको छ । विद्यालयका अभिभावकहरुलाई पाखा लगाएर जनप्रतिनिधिहरुलाई अध्यक्ष बनाउने कार्यको विद्यालय सम्बद्ध विभिन्न संघ संगठनहरुले आपत्ति जनाउँदै आएका छन् ।
