केभिन डे ब्रुयनाको उत्कृष्ट प्रदर्शनमा बुधबार राति सिटीले घरेलु मैदानमा आर्सनललाई ४–१ ले हरायो । डे ब्रुयनाले दुई गोल गर्नुका साथै एक असिस्ट गरे । जोन स्टोन्स र एर्लिङ हालान्डले समान १–१ गोल गरे ।
आर्सनललाई पराजित गरेपछि सिटी उपाधि होडमा फर्किएको छ । अब आर्सनल र सिटीबीच जम्मा २ अंकको दूरी छ भने सिटीले अझै दुई खेल कम खेलेको छ । जसले गर्दा सिटी उपाधि होडमा बलियो बनेको छ ।
३३ खेलबाट बर्सनलको ७५ अंक छ भने ३१ खेलबाट सिटीले ७३ अंक जोडेको छ ।
घरेलु मैदान इतिहाड स्टेडियममा डे ब्रुयनाले हालान्डको पासमा सातौँ मिनेटमा गोल गरी सिटीलाई अग्रता दिलाएका थिए । पहिलो हाफको इन्जुरी टाइममा डे ब्रुयनाको पासमा स्टोन्सले गोल गरी अग्रता दोब्बर पारे ।
५४औं मिनेटमा डे ब्रुयनाले हालान्डकै पासमा गोल गरेपछि सिटीले ३–० को अग्रता बनायो ।
८६औं मिनेटमा आर्सनलका रब होल्डिङले लिएन्ड्रो ट्रोसार्डको पासमा गोल गर्दै गोल अन्तर कम पारे पनि ढिला भइसकेको थियो ।
इन्जुरी टाइममा हालान्डले फिल फोडेनको पासमा गोल गरेपछि सिटीले सहज जित हात पारेको हो ।
लिग अब आर्सनलले ५ र सिटीले ७ खेल खेल्न बाँकी छ । सिटीले आफ्नो बाँकी खेल जितेमा लिग उपाधि जित्नेछ ।
