दोस्रो पालीमा पनि भारतीय ब्याट्सम्यानले गतिलो प्रदर्शन गर्न सकेनन् । जितका लागि ४ सय ४४ रनको विशाल लक्ष्य पछ्याएको भारतका लागि दोस्रो पालीमा विराट कोहलीले सर्वाधिक ४९ रन बनाएका थिए । अजिनक्या रहानेले ४६ रन बनाए भने कप्तान रोहित शर्मा ४३ रनमा आउट भए ।
अन्य ब्याट्सम्यानले गतिलो प्रदर्शन गर्न सकेनन् । दोस्रो पालीमा अस्ट्रेलियन बलर स्कट बोल्यान्ड र नाथन लियोनले तीन÷तीन विकेट लिए । मिचेल स्टार्कले पनि दुई विकेट हात पारे । टस हारी पहिलो ब्याटिङको निम्तो पाएको अस्ट्रेलियाले पहिलो पालीमा चार सय ६९ रनको विशाल योगफल तयार पारेको थियो ।
पहिलो पालीमा अस्ट्रेलियाका लागि टार्भिस हेडले एक सय ६३ र स्टिभन स्मिथले एक सय २१ रन बनाएका थिए । भारतीय टोली भने पहिलो पालीमा पनि दुई सय ९६ रनमा अलआउट भएको थियो । भारतका लागि पहिलो पालीमा अजिनक्या रहानेले ८९ रन बनाएका थिए । सार्दुल ठाकुरले पनि ५१ रन जोडेका थिए ।
त्यसपछि अस्ट्रेलियाले आठ विकेटको नोक्सानीमा दुई सय ७० रन बनाउँदै दोस्रो पाली समाप्तिको घोषणा गरेको थियो । अस्ट्रेलियाका लागि दोस्रो पालीमा एलेक्स केरीले अविजित ६६ रनको योगदान गरेका थिए । ओभलमा भएको उक्त खेलमा अस्ट्रेलियाका टार्भिस हेड म्यान अफ दी म्याच घोषित भए ।