म्यानमारको राजधानी याङ्गोनस्थित रंगशालामा उक्त खेल खेलिने छ । नेपाल र म्यानमारबीचको खेल नेपाली समयअनुसार, मंगलबार साँझ ५ः४५ बजे सुरु हुनेछ । नेपाली टोली पहिलो खेलमा म्यानमारलाई हराएर प्रतियोगिताको सुखद सुरुआत गर्ने धुनमा छ ।
नेपाली टोलीका मुख्य प्रशिक्षक यमप्रसाद गुरुङले पहिलो चरणको छनोट प्रतियोगितामा हासिल गरेको सफलताले टोलीको मनोबल उच्च रहेको बताए । प्रतियोगिताको अघिल्लो दिन आयोजित पत्रकार सम्मेलनमा उनले दोस्रो चरणको छनोटमा पनि नेपाली टोली हरेक खेलमा उच्च मनोबल लिएर मैदानमा ओर्लने दाबी पनि गरे ।
छनोट प्रतियोगिताको दोस्रो चरणमा नेपाली टोली समूह ’बी’ मा परेको छ । नेपालको समूहमा चीन, म्यानमार र चाइनिज ताइपेइ रहेका छन् । नेपाले जुन ८ तारिखमा चीन र जुन १० तारिखमा चाइनिज ताइपेइसँग छनोट खेल खेल्नेछ ।
यसअघि प्यालेस्टाइनमा भएको पहिलो चरणको छनोट प्रतियोगितामा उत्कृष्ट प्रदर्शन गर्दै नेपाल दोस्रो चरणको छनोटमा प्रवेश गरेको हो ।
