१५१ रनको लक्ष्य सुदूरपश्चिमले २९.४ ओभरमा पाँच विकेट गुमाउँदै भेट्टायो । उसका लागि गजेन्द्र बोहराले सर्वाधिक ४१ रनको योगदान दिए ।
अविजित रहेका शेर मल्लले ३४ र कप्तान राजु रिजालले २४ रन जोड्दा टेक रावलले १८ रन बनाए । कर्णालीका लागि कप्तान रवीन्द्र शाहीले तीन तथा दिवान पुनले दुई विकेट हात पारे ।
त्यसअघि मूलपानी क्रिकेट मैदानमा टस हारेर ब्याटिङको निम्तो पाएको कर्णालीले ३९.१ ओभरमा सबै विकेट गुमाउँदै १५० रन बनाएको थियो ।
उसका लागि अर्जुन घर्तीले ९६ बलमा पाँच छक्का र चार चौकासहित ७० रनको उत्कृष्ट पारी खेले । सुवास ऐर २४ र हिमान्शु शाहीले १२ रन जोडे ।
सुदूरपश्चिमका लागि नारायण जोशीले चार, हेमन्त धामीले तीन,गजेन्द्र बोहराले दुई तथा मिलन बोहराले एक विकेट हात पारे ।
जितसँगै चार खेलमा २ अंक जोडेको सुदूरपश्चिम चौथो स्थानमा रहँदा लगातार तेस्रो पराजय बेहोरेको कर्णाली विना अंक पुछारमा छ । दुवै टोली समूह चरणबाटै बाहिरिसकेका छन् ।
