नयाँ बानेश्वरको अण्डरग्राउण्ड पसलहरु, सुनधारास्थित काठमाडौं मलदेखि खिचापोखरीको आरबी कम्प्लेक्ससमेतको अनधिकृत संरचनामा हटाउन काठमाडौं महानगरले डोजर बुधबार डोजर चलायो । अनधिकृत संरचना हटाउन अटेर गरेपछि डोजर लिएरै मैदानमा उत्रिएका बालेन शाहले एकपछि अर्को ठूला ब्यवसायिक कम्प्लेक्सहरुको कर्तुतको पर्दाफास गरेका छन् ।
विहीबार बुद्धनगरस्थित अल्फाबिटा कम्प्लेक्समा पनि अनधिकृत रुपमा अण्डरग्राउण्डमा फार्मेसी सञ्चालन गरिएको ठाउँमा अनुगमन गर्न मेयर शाह पुगेका थिए । कम्प्लेक्सका निर्देशक द्विराज शर्माले उल्टै आफ्नो कम्प्लेक्सको नक्सा देखाउन मेयर शाहलाई च्यालेन्ज दिए । शाह शर्मासँग झोक्किँदै, तपाईँको घरको नक्सा मसँग हुन्छ, कि तपाईँसँग ? भन्दै प्रश्न गरे । तर शर्माले महानगरसँगै हुने भन्दै फेरि जवाफ फर्काए । त्यसपछि शाह त्याहाँबाट निस्किए । र, महानगरको कार्यालय पुगेर अल्फाबिटा कम्प्लेक्सको नक्सा निकाले । सँगसँगै महानगरको डोजर पनि सँगसँगै लिएर अल्फाबिटा पुगे ।
पेशाले इन्ट्रक्चर इन्जिनियर रहेका मेयर शाहले नक्सा देखाइदिए, अनि अनधिकृत सञ्चालित अल्फा फार्मेसीमा डोजर लगाउन निर्देशन दिए । ‘उहाँ (अल्फाबिटाका निर्देशक)ले आफ्नै नक्सा मलाई माग्नु भयो । मैले अफिस गएर नक्सा र डोजर लिएर गएँ । मैले के बिराएँ ?’– मेयर शाहले भनेका छन् ।
बालेन शाहले अबैधानिक रुपमा बनाइएका संरचना हटाइदिन सामाजिक सञ्जाल फेसबुकबाट पुनः अपिल गरेका छन् । ‘अब उप्रान्त यस्तो गर्न नपरोस, सबैले आफै बुझेर अवैधानिक रुपमा बनाइएको संरचना हटाइदिनु होला, नक्सा जसरी पास भएको छ, त्यही अनुसार बनाइदिनु होला ।’– शाहले भनेका छन् ।
