१ सय ९३ रनको विजयी लक्ष्य पछ्याएको राजस्थान २० ओभरमा ९ विकेट गुमाउँदै मात्र १ सय ५५ रनमा समेटियो । राजस्थानका लागि ओपनर जस बटलरले सर्वाधिक ५४ रन जोडे भने शिम्रन हेटमायरले २९, रियान पराग १८, जिमी निशम १७ र सञ्जु स्यामसनले ११ रन जोडे । राजस्थानका अन्य ब्याट्सम्यानले दोहोरो अंक जोड्न सकेनन् ।
गुजरातका लोकी फर्गुसन र डेब्यू खेल खेलेका तीव्र गतिका बलर यश दयालले समान ३–३ विकेट तथा मोहम्मद शामी र हार्दिक पान्ड्याले १–१ विकेट लिएका थिए ।
पहिले ब्याटिङ सम्हालेको गुजरातका लागि हार्दिक पाण्डेले अर्धशतक पार गरे । गुजरातका लागि उनले ५२ बल खेल्दै ८ चौका र ४ छक्काको मद्दतमा सर्वाधिक नटआउट ८७ रन बनाए भने अभिनभ मनोहरले ४३ रनको योगदान गरे । चौथो विकेटका लागि पाण्डे र मनोहरले ८६ रनको साझेदारी गरेका थिए ।
यस्तै, गुजरातका डेविड मिलरले १४ बलमा ५ चौका र १ छक्कासहित नटआउट आक्रामक ३१ रनको योगदान गरे भने म्याथ्यु वेडले १२ रन तथा र सुभमन गिल १३ रन जोडे । राजस्थानका कुलदीप सेन, युजभेन्द्र चहल र रियान परागले समान १–१ विकेट लिएका थिए ।
गुजरातले अब आइतबार चेन्नई सुपर किंग्ससँग खेल्नेछ भने पराजित राजस्थानले सोमबार कोलकाता नाइट राइडर्ससँग खेल्ने तालिका छ ।
आईपीएलमा शुक्रबार सनराइजर्स हैदारावाद र कोलकोत्ता नाइट राइडर्सबीच खेल हुनेछ ।
