चितवन। नारायणगढको हङकङ बजारस्थित 'चितवन स्कूल अफ फेशन'मा अध्ययनरत विद्यार्थीहरुले तयार पारेको पोषाक प्रस्तुती रहेको 'नाइट अफ विशेज’ कार्यक्रम सम्पन्न भएको छ ।
भरतपुर–३ क्षेत्रपुरस्थित सनसिटी वेन्क्विटमा शुक्रबार साँझ भएको कार्यक्रममा आकर्षक डिजाइनहरुमा मोडलहरुले र्याम्प वाक गरेका थिए । चितवनका विभिन्न सौन्दर्य प्रतियोगिताना सहभागी २० भन्दा बढी मोडलहरुले चितवन फेसनमा अध्ययनरत १८ जना विद्यार्थीहरुले डिजाइन गरेको पोषाकमा र्याम्प गरेका थिए ।
क्रिसमसको पूर्व सन्ध्यामा ‘क्रिसमस थिम’, ‘क्याजुअल’ ‘लोलिता’ लगायतका बिभिन्न थिममा डिजाइनरहरुले तयार पारेको पोषाकमा मोडलहरुले वाक गरेका थिए । उनीहरुलाई कोरियोग्राफर मनिष तामाङले कोरियोग्राफी गरेका थिए । कार्यक्रम दुई सिक्वेन्समा भएको थियो । २०७५ सालमा स्थापना भएको स्कुलमा अहिले १८ जना विद्यार्थीले फेशन डिजाइनिङ अध्ययन गरिरहेका छन् ।
फेसन डिजाइन अध्ययन गर्न चितवन बाहेक गोरखा, नवलपुरलगायतका जिल्लाबाट विद्यार्थीहरु चितवन आउने गरेका छन् ।