पहिलो हाफमा गोलरहित बराबरी खेलका दुवै टिमले दोस्रो हाफमा एक एक गोल गरेपछि खेल बराबरीमा टुंगियो । जर्मनीका जोनास हफम्यानले खेलको ५० औं मिनेटमा गोल गरी अग्रता कायम राखेका थिए ।
खेलको ८८ औं मिनेटमा इंग्ल्याण्डले पाएका पेनाल्टी ह्यारी कानेले सदुपयोग गर्दै बललाई जाली चुमाएका थिए । बराबरीसँग जारी लिगमा २ अंकसहित जर्मनी तेस्रो तथा इंग्ल्यान्ड १ अंकसहित पुछारमा रहेको छ ।
यस्तै गएरातीकै अर्को खेलमा युरो च्याम्पियन इटालीले पहिलो जित निकालेको छ ।
समूह चरण अन्तर्गत मंगलबार राति भएको खेलमा हंगेरीलाई २–१ गोल अन्तरले हराउँदै इटालीले जारी प्रतियोगितामा पहिलो जित निकालेको हो ।
ओरोगेल रंगशालामा इटालीमा मंगलबार राति भएको खेलमा घरेलु टोलीलाई जिताउन निकोलो बरेल्ला र लोरेन्जो पलिग्रेनीले गोल गरे भने हंगरीले उपहार गोल पाएको थियो ।
खेलको ३०औं मिनेटमा निकोलो बरेल्लाको गोलबाट इटालीले सुरूआती अग्रता लिएको थियो ।
४५औं मिनेटमा लोरेन्जो पेलिग्रेनीले गोल गर्दै इटालीको पहिलो हाफमा २–० को अग्रता दिलाए । तर ६१ औं मिनेटमा जियानलुका मान्सिनीले आत्मघाती गोल गरे ।
पहिलो जितसँगै लिग ए समूह ३ को इटालीले २ खेलबाट ४ अंक जोडेर समूहमा शीर्षस्थानमा उक्लिएको छ । पहिलो हार बेहोरेको हंगेरी ३ अंकका साथ दोस्रो स्थानमा झरेको छ ।
यस्तै, यूईएफए नेशन्स लिगको मंगलबार रातीको अन्य खेलमा फिनल्याण्डले मोन्टेनेग्रोलाई २–०, बोस्निया हर्जगोविनाले रोमानियालाई १–०, लक्जमवर्गले फारोइ आईल्याण्डलाई १–०ले पराजित गर्दा टर्कीले लिथुनियालाई ६–० गोलको पराकिलो अन्तरले हराएको छ ।