नेपालगञ्जमा जारी सातौँ प्रधानमन्त्री कप आमन्त्रण महिला भलिबल प्रतियोगिताको शनिकारको खेलमा पुलिस क्लबले दोस्रो जित निकाल्दा सशस्त्र प्रहरीको एपीएफ टिम आर्मी क्लबमाथि हावी भएको छ ।
प्रतियोगितामा एपीएफले त्रिभुवन आर्मी क्लब र पुलिसले लुम्बिनी युनाइटेडलाई हराउँदै अघि बढेका हुन् । पहिलो खेलमा एपीएफले आर्मीलाई ३–१ को सेटमा पराजित गरेको थियो । पहिलो सेट आर्मीले २६–२४ ले जिते पनि त्यसपछिका तीन सेट लगातार पराजय ब्यहोर्नुपर्यो । एपीएफले २५–२३, २५–१६ र २५–२३ मा आर्मीलाई हराएको थियो ।
सो खेलमा एपीएफकी निरुता ठगुन्ना प्लेयर अफ द म्याच घोषित भइन् । उनलाई अन्तर्राष्ट्रिय रेफ्री अजित शर्मा र वेस्टर्न अस्पतालका निर्देशक राहुल थापाले पुरस्कृत गरे ।
दोस्रो खेलमा पुलिसले लुम्बिनी युनाइटेडलाई सोझो सेटमा पराजित गरेको छ । पुलिसको यो दोस्रो जीत हो । जीतसँगै पुलिस लिगको शीर्षस्थानमा पुगेको छ । पुलिसले लुम्बिनीलाई २५–८, २५–१२ र २५–१४ को सोझो सेटमा हराएको हो । डिफेन्डिङ च्याम्पियन पुलिसको अगाडि लुम्बिनी कमजोर सावित भयो ।
सो खेलमा पुलिसकी उषा भण्डारी प्लेयर अफ द म्याच भइन् । उनलाई नेपालगञ्ज उद्योग वाणिज्य संघका प्रवक्ता टंक धामी र इन्टरनेट प्रदायक कम्पनी भायोनेटका शाखा प्रमुख भानु रेग्मीले पुरस्कृत गरे ।
लुम्बिनीका प्रशिक्षक भीम डाँगीले सेट अभ्यास बिना नै आए पनि प्रतियोगितामा खेलाडीले राम्रो खेल प्रदर्शन गरेकोमा सन्तोष व्यक्त गरेका छन् । लुम्बिनीमा रुपन्देही, दाङ र बाँकेका स्थानीय खेलाडी छन् ।
पुलिसका प्रशिक्षक रुपेश विष्टले लुम्बिनी अलि कमजोर टीम भएकाले नयाँ खेलाडीलाई मौका दिएको बताए । प्रतियोगितामा आइतबार लुम्बिनी युनाइटेड विरुद्ध एपीएफ तथा न्यू डायमण्डविरुद्ध आर्मीको खेल हुनेछ ।
प्रतियोगिताको विजेताले ५ लाख नगद प्राप्त गर्नेछ भने उपविजेता टिमले २ लाख, तेस्रो हुनेले १ लाख नगद प्राप्त गर्नेछन् । पीएम कपको पहिलो संस्करणमा नेपाल पुलिस क्लब, दोस्रो संस्करणमा एपीएफ, तेस्रो र चौथो संस्करणमा रेलवे टिम इन्डिया र छैटौँ संस्करणमा नेपाल पुलिस क्लबले च्याम्पियन ट्रफी उचालेका थिए । नेपाली भलिबलमा यो सर्वाधिक धनराशिको पुरस्कार भएको प्रतियोगिता हो ।
प्रकाशित मिति: शनिबार, फागुन २२, २०७७, १८:३६:००