निगमले तत्कालका लागि संकट टार्न पेट्रोलियम पदार्थको खपत कम गर्न दुईपाङ्ग्रे र साना सवारीसाधनलाई पेट्रोल कम दिनेगरी प्रस्ताव अघि सारेको छ। पेट्रोलियम पदार्थमा भएको मूल्यवृद्धिका कारण वित्तीय स्थिति नाजुक भइरहेको भन्दै निगमले सरकारलाई पत्र लेखेर विभिन्न १० उपाय सिफारिस गरेको छ ।
‘बढीमा एकपटकमा मोटरसाइकललाई ५ लिटर, कार र जीपलाई २० लिटर मात्रै इन्धन उपलब्ध गराउने देखि लिएर शनिबार प्रमुख सहरमा सवारी साधन निषेध गर्न पनि सरकारलाई सुझाव समेत निगमले दिएको छ ।
निकट भविष्यमै इन्धन आपूर्ति प्रभावित हुन सक्ने चेतावनीसहितको गुनासोसमेत सरकारसमक्ष राखेको छ।
यस्ता छन् निगमका सुझाव
– मोटरसाइकल र स्कुटरलाई एक पटकमा पाँच लिटर र कार÷जीप लगायत साना सवारी साधनलाई २० लिटर मात्रै इन्धन दिने।
– सरकारी र निजी सवारी साधनमा जोरबिजोर प्रणाली लागू गर्ने।
– आइतबार सार्वजनिक बिदा दिने निर्णय पुनः लागू गर्नुपर्ने।
– छोटा दूरीमा सवारी साधनको प्रयोग नगरी पैदल यात्रा गर्न आह्वान गर्ने।
– देशका प्रमुख सहरहरुमा प्रत्येक शनिबार गाडीरहित सार्वजनिक बिदाको घोषणा गर्ने।
– विद्युतीय सवारी साधनको प्रयोगमा वृद्धि गर्न प्रमुख सहर र राष्ट्रिय राजमार्गहरुमा निःशुल्क चार्जिङ स्टेशन निर्माण गर्नुपर्ने।
– सार्वजनिक निजी पार्किङ स्थानमा विद्युतीय सवारी साधनका लागि निःशुल्क पार्किङस्थल तोक्नु पर्ने।
– पेट्रोलियम पदार्थबाट चल्ने सवारी साधन र अन्य उपकरण आयातमा प्रतिबन्ध लगाउनु पर्ने।
– एलपीजी ग्यासको खपत कम गर्न विद्युतीय चुल्हो सहुलियत दरमा बिक्री गर्न र घरायसी प्रयोजनको बिजुलीको शुल्क कम गर्नु पर्ने।
– ठूला उद्योग, परियोजना, होटल लगायतले डिजल र एलपीजी ग्यासको खपत नगरी बिजुलीको खपत गर्ने नियम बनाउनु पर्ने।
