चिनिया विदेशमन्त्री वाङले शनिबार साँझ बालुवाटारमा प्रधानमन्त्री शेरबहादुर देउवासँगको भेटको अवसरमा विमानस्थल हस्तान्तरण स्वरुप परराष्ट्रमन्त्री नारायण खड्कालाई चाबी बुझाएका हुन् ।
प्रधानमन्त्री शेरबहादुर देउवासँग शिष्टाचार भेटवार्ता सकिएपछि चिनियाँ विदेशमन्त्री वाङले त्यहींबाट भर्चुअल रुपमा सो विमानस्थलको समापन गरेका थिए । त्यसपछि विमानस्थल नेपाललाई हस्तान्तरण गरिएको थियो ।
चीनको एक्जिम बैंकले २ प्रतिशत ब्याजदर कायम गरी पोखरा विमानस्थल बनाउन नेपाललाई २१ अर्ब ६० करोड रुपैयाँ ऋण दिएको थियो । निर्माणको काम चिनियाँ ठेकेदार कम्पनी सीएएमसीले गरिरहेको छ ।
पोखरा साँघुरो उपत्यका भएका कारण पूर्वबाट मात्र अवतरण र उडान गर्न सक्ने विज्ञहरूको धारणा अनुसार वाइडबडी भएका जहाजको सट्टा करिब १८० सिट क्षमताका न्यारोबडीका जहाज मात्र सञ्चालन गर्न सकिने किसिमले २ हजार ५ सय मिटर धावनमार्ग भएको विमानस्थल निर्माण गरिएको छ ।
पोखरा विमानस्थल आयोजनाका प्रमुख ईन्जिनिअर विनेश मुनंकर्मीकाअनुसार, नेपालमा नै पहिलो पटक कंक्रिटको धावनमार्ग निर्माण गरिएको छ ।
पोखरा क्षेत्रीय अन्तर्राष्ट्रिय विमानस्थल निर्माणको काम भने अझै सकिएको छैन । विमानस्थल निर्माण कार्य २०७९ असार मसान्तसम्म पूरा गर्नुपर्नेछ ।
यसअघि लक्ष्यभन्दा छ महिना अगावै निर्माण सम्पन्न गर्ने भनिए पनि कोरोना (कोभिड १९) महामारीका कारण काममा अवरोध आएको थियो ।