काठमाडौं उपत्यकासँगै देशका मुख्य शहरहरुमा कोरोना संक्रमित र अस्पताल भर्ना हुने बिरामीको संख्या बढ्न थालेको छ । यद्यपि प्रदेशगत तथ्याङ्क हेर्ने हो भने प्रदेश २ मा संक्रमण निकै न्यून देखिन्छ ।
सातवटा प्रदेशमध्ये बागमतीमा संक्रमितको संख्या सर्वाधिक छ भने प्रदेश २ मा सबैभन्दा कम देखिएको छ । भदौ १ देखि १० गतेसम्मको तथ्याङ्कलाई आधार मान्ने हो भने यो अवधिमा बागमती प्रदेशमा १२ हजार ४१८ नयाँ संक्रमित थपिएका छन् । प्रदेश २ मा भने उक्त १० दिनको अवधिमा जम्मा ७५ जना नयाँ संक्रमित थपिएका छन् ।
यस्तै, प्रदेश १ मा विगत १० दिनमा ३ हजार ६६१ नयाँ संक्रमित थपिँदा गण्डकी प्रदेशमा २ हजार ७१३, लुम्बिनी प्रदेशमा एक हजार १५८, कर्णाली प्रदेशमा ३८६ र सुदूरपश्चिम प्रदेशमा २६५ संक्रमित थपिएका छन् ।
यो तथ्याङ्कलाई आधार मान्ने हो भने प्रदेश २ अन्य प्रदेशको तुलनामा कोरोना संक्रमण नियन्त्रणतिर उन्मुख भएको देखिन्छ । तर जनस्वास्थ्यविद्हरु भने यो तथ्याङ्कलाई त्यसरी बुझ्न नहुने बताउँछन् । उनीहरु परीक्षणको दर कति छ भन्ने तथ्याङ्क अध्ययन गरेरमात्र निष्कर्षमा पुग्न आवश्यक रहेको बताउँछन् ।
जनस्वास्थ्य विज्ञहरुले कोरोना परीक्षणलाई सरकारले तीव्रता दिन नसकेको बताउँदै आएका छन् । सरकारले सबै प्रदेशमा कोरोना परीक्षणलाई एउटै गतिमा तीव्रता दिन सकेको छैन । अन्य प्रदेशको तुलनामा प्रदेश २ मा कोरोना परीक्षण दर पनि कम रहेका कारण संक्रमण दर ज्यादै न्यून देखिएको उनीहरुको तर्क छ ।
