बुधबार मात्रै स्वास्थ्यमन्त्रीसँगको भेटमा देशैभरका पत्रकारको निःशुल्क उपचार गराउने स्वास्थ्यमन्त्री विरोध खतिवडाले प्रतिवद्धता जनाएको श्रमजीवी पत्रकार संघका अध्यक्ष जन्मदेव जैसीले बताए ।
पत्रकार एलवी विश्वकर्माको सिभिल हस्पिटलको लापरवाहीबाट मृत्यु भएपछि त्यसको छानविनसहित दोषीलाई कारवाहीसँगै पत्रकारको निशुल्क उपचारका लागि संघले धर्नासहित निरन्तर दवाव दिंदै आएको थियो ।
पत्रकार महासंघको स्थापना दिवसको अवसरमा मन्त्री खतिवडाले देशभरका हस्पिटलमा पत्रकारको उपचार निःशुल्क गर्ने सरकारको यसअघिको निर्णय कार्यान्वयन गर्ने प्रतिवद्धता व्यक्त गरेको जैसीले बताए ।
साथै मृतक पत्रकार एलवी विश्वकर्मालाई न्यायका लागि मेडिकल काउन्सिलले डा. हरिहर अवस्थीको नेतृत्वमा गठित छानविन समितिको छानविन प्रक्रिया छिटो टुङ्गोमा पुरयाई दोषीलाई कारवाही र मृतकलाई उचित क्षतिपूर्ति दिलाउन स्वास्थ्यमन्त्री खतिवडाले भूमिका खेल्ने र पत्रकारहरुको निशुल्क उपचार गर्ने घोषणा तत्काल कार्यान्वयन हुनेमा विश्वस्त रहेको जैसीले बताए ।
संघले श्रमजीवी पत्रकारको मुद्दामा आवाज उठाउँदै आएको छ ।