काठमाडौँ । आईसीसी टी २० विश्वकपमा आज ( आइतबार ) दुई चिरप्रतिद्धन्द्धी भारत र पाकिस्तान आपसमा भिड्दैछन्। विश्वकपमा भारत र पाकिस्तानबीचको खेललाई सबैले चासोका साथ लिने गर्छन् । भारत र पाकिस्तानका समर्थकहरूले खेललाई एउटा लडाइको रूपमा लिने गर्नाले पनि यी दुईबीचको खेलमा चासो बढेको हो ।
यूएईको आबुधावीमा नेपाली समयअनुसार पौने ८ बजे सुरु हुने खेलमा पाकिस्तान प्रतियोगिताको इतिहासमा भारतसँग लगातार पाँच खेलको हार टुंग्याउने प्रयाशमा रहने छ।
भारत र पाकिस्तानबीच लामो समयबाट राजनीतिक तनाव रहँदै आएको छ। जसको असर खेल क्षेत्रमा समेत देखिने गरेको छ। भारत र पाकिस्तानबीचको क्रिकेट खेललाई एक अर्काको प्रतिष्ठासँग जोडेर समेत हेरिने गरिएको छ। सन् २०१९ को एक दिवसीय विश्वकपपछि भारत र पाकिस्तानबीच पहिलो पटक प्रतिस्पर्धा हुन लागेको हो ।
