काठमाडौं । अमेरिकी सहयोग परियोजना एमसीसीबारे निर्णय लिन शनिवार नेकपा (एकीकृत समाजवादी)को स्थायी कमिटी बैठक बस्दै छ ।
एमसीसीबारेमा राष्ट्रिय अन्तर्राष्ट्रिय बहस र आन्दोलन भइरहँदा पनि माधव नेपाल नेतृत्वको एकीकृत समाजवादीले निर्णय गरेको थिएन । यद्यपि एकीकृत समाजवादीको युवा संगठन भने एमसीसीको विरोधमा प्रदर्शन गर्दै आएको छ ।
एमसीसीबारेमा नेता नेपाल मौन रहँदै आएका छन् । नेकपा एसले फागुन ७ गतेपछि मात्रै एमसीसीबारे बोल्ने बताउँदै आएका थिए । सत्ता गठबन्धनको अघिल्लो बैठकमा पनि एकीकृत समाजवादीले फागुन ७ गतेसम्म पर्खन कांग्रेसलाई आग्रह गरेको थियो ।
आजको स्थायी कमिटीको बैठकमा समसामयिक राष्ट्रिय राजनीति, चुनावको तयारी, पार्टीको आन्तरिक गतिविधि लगायतका विषयमा छलफल हुने पार्टीका महासचिव वेदुराम भुसालले बताए ।
