काठमाडाैँ । नेपाल कम्युनिष्ट पार्टी (एकीकृत समाजवादी)का अध्यक्ष माधवकुमार नेपालले मुलुकलाई पुनः प्रतिगमनतर्फ लैजाने प्रयास भइरहेकाले त्यसविरुद्धका शक्ति एकताबद्ध हुन आवश्यक रहेको बताएका छन् ।
समाजवादी प्रेस संगठनले आज यहाँ आयोजना गरेको 'प्रतिगमनको खतरा, लोकतन्त्र र संविधानको रक्षा' विषयक अन्तक्र्रियामा अध्यक्ष नेपालले संसद् अवरोध प्रतिगमनको एउटा नमुना भएको जिकिर गरे । नेकपा (एस)मा सहभागी भएका १४ सांसदमाथि गरिएको कारबाही कार्यान्वयनका विषयमा सभामुखले असहयोग गरेको आरोप लगाउँदै एमालेले संसद् अवरोध गर्दै आएको छ ।
राजनीतिक इतिहासका खलनायकले देशलाई प्रतिगमनतिर लैजान खोजेको आरोप लगाउँदै अध्यक्ष नेपालले पछिल्लो सरकार गठनका विषयमा सांसद स्वतन्त्र हुन पाउने अधिकारलाई सङ्कुचित बनाउन नहुने बताए । उनले अदालतमा विचारधिन विषयलाई लिएर संसद् गतिरोध गर्नु संविधान विपरित रहेको तर्क गरे ।
पूर्व प्रधानमन्त्री नेपालले प्रतिगमन विरुद्व निर्माण भएको गठबन्धनको संस्कृतिलाई आगामी निर्वाचन तथा त्यसपछि पनि निरन्तरता दिइने बताए । उनले निर्वाचनमा एकल पार्टीको बहुमत आउन कठिन रहेकाले पनि गठबन्धनले निरन्तरता पाउने विश्वास व्यक्त गरे ।
सञ्चार तथा सूचना प्रविधिमन्त्री ज्ञानेन्द्रबहादुर कार्कीले मुलुकमा निरङ्कुशता लाद्न प्रतिगमनको प्रयास भएकाले त्यसको अन्त्य गर्नका लागि ५ दलीय गठबन्धन गठन भएको स्पष्ट पारे । नेपाली कांग्रेस नेता कार्कीले आगामी दिनमा पनि गठबन्धनको शक्तिलाई थप बलियो बनाइने बताए ।
नेकपा(एस)का उपमहासचिव डा.विजय पौडेलले जनअधिकार सुनिश्चितताका लागि लोकतन्त्रको विकल्प नरहेको प्रष्ट पारेका छन् । राष्ट्रिय जनमोर्चाका महासचिव मनोज भट्टले जनतामा आएको चेतनाका साथै विश्वव्यापी रुपमा सूचना प्रविधिमा भएको विकासका कारण मुलुकमा कसैले पनि श्वेच्छाचारी रुपमा प्रतिगमन गर्न नसक्ने उल्लेख गरे । संगठनका अध्यक्ष शम्भु श्रेष्ठले एक वर्ष अगाडि पार्टीमा कमजोर भएपछि एमाले नेतृत्वले असंवैधानिक ढंगबाट संसद् विघटन गरेर देश र जनतालाई धोका दिएको आरोप लगाए ।
