परराष्ट्रमन्त्री खड्का तथा प्रधानसेनापति शर्माको जवाफ चित्तबुझ्दो नभएपछि समितिले यससँग सम्बन्धित कागजपत्र उपलब्ध गराउन नेपाल सरकार र परराष्ट्र मन्त्रालयलाई निर्देश गरेको हो ।
समितिले परराष्ट्र नीति विपरीत गएर कुनै पनि सैन्य एवं सामरिक महत्वका विषयमा नेपालले सहभागिता जनाउन नहुने भनी सरकारलाई सचेत गराएको छ ।
यस सम्बन्धि सरकारसँग सबै कागजात मगाउनुका साथै प्रधानमन्त्रीको अमेरिका भ्रमण र एसपीपीका विषयमा उठेका प्रश्नहरुको जवाफ दिन समितिले आइतबार प्रधानमन्त्री शेरबहादुर देउवालाई समेत समितिको बैठकमा बोलाएको समिति सभापति पवित्रा निरौला खरेलले जानकारी दिइन् ।
अन्तर्राष्ट्रिय सम्बन्ध समितिको शुक्रबारको बैठकमा एसपीपीबारे छलफल भएको थियो । छलफलका क्रममा एमाले नेता एवम् पूर्वउपप्रधान तथा रक्षामन्त्री ईश्वर पोखरेलले सेनाको उक्त पत्रमा लेखिएको मिति हस्तलिखितबारेमा प्रश्न उठाएका थिए ।
जवाफमा प्रधानसेनापति शर्माले नेपाल सेनामा आज लेखिएको पत्र आज नै नजाने भएकाले जुन दिन पठाइन्छ, त्यही दिन हातले मिति लेख्ने प्रचलन रहेको बताए । प्रधानसेनापति शर्माले उक्त पत्र सेनाले आधिकारिक रुपमा पठाएको र त्यसको सक्कल प्रति पनि साथमै लिएर आएका थिए ।
नेकपा एमालेका सांसद डा. भीम रावल र परराष्ट्रमन्त्री डा.नारायण खड्काबीच भनाभन नै भएको थियो ।
एसपीपीका लागि तत्कालीन प्रधानसेनापति राजेन्द्र क्षत्रीले सन् २०१५ मा पठाएको पत्र सार्वजनिक भएसँगै एसपीपी बहस चुलिएको छ ।
