वैशाख ३० गते सम्पन्न मतदानबाट निर्वाचित भएका जनप्रतिनिधिहरुले स्थानीय सरकारको नयाँ नेतृत्व सम्हाल्दै गर्दा काठमाडौं त्रिभुवन अन्तर्राष्ट्रिय विमानस्थलमा भने वैदेशिक रोजगारीको शिलशिलामा विदेश जानेको ताँती लागिरहेको छ ।
‘चुनाव सकियो, रोजगार दिँदैनन्, रोजीरोटीका लागि विदेश जानै पर्यो नि ।’– वैदेशिक रोजगारीको शिलशिलामा दुवई जान भन्दै विमानस्थल गेटमा लाम लागेका युवक नबिन थापाले भने ।
मंगलबार बेलुका खबरस्टोरी टिम विमानस्थल छिर्दै गर्दा विदेश जानेहरुको ताँतीले विमानस्थल खचिखचाउ देखिएको थियो ।
विमानस्थलमा विदेश जान लागेका युवा युवतिहरु कोही रुँदै, कोही अंकमाल गर्दै त कोही फोटो खिचाउँदै गरेका देखिन्थे ।
केही दिनअघि विभिन्न राजनीतिक दलका झण्डा बोकेर हिडिरहेका युवाहरुसमेत पुनः देशमै रोजगारीको अभावमा विदेशतिर हिड्दै गरेको दृष्यले प्रश्नचिन्ह खडा गरिदिएको छ ।
