सिद्धार्थ राजमार्गअन्तर्गत बुटवल–पाल्पा सडकको सिद्धबाबा खण्डमा मंगलबार बिहानै गएको पहिरोले यातायात सेवा अवरुद्ध बनेको छ ।
पाल्पाको तिनाउ गाउँपालिकाको माथिल्लो सिद्धबाबा नजिकै ठूलो पहिरो खसेको छ । सँगसँगै सडकमाथिबाट पानीको ठूलो छहरा खस्दा साना सवारीसाधनहरुको आवागमन पनि मंगलबार विहान ६ बजेदेखि रोकिएको छ । पानीको छहरासँगै गएको पहिरोले सवारीसाधन आवागमन रोकिन पुगेको लुम्बिनी प्रदेश ट्राफिक प्रहरी कार्यालय बुटवलले जनाएको छ ।
सिद्धबाबा र झुम्साका बीचमा ढुंगा र पहिरोहरु खसेको दोभान प्रहरी चौकीले जनाएको छ ।
यस्तै, रुपन्देहीसहित धेरै ठाउँमा बिहानैदेखि वर्षा भइरहेको छ । वर्षाले ठाउँठाउँका सडकहरुमा पानी जम्दा यातायात ओहोरदोहोरमा समस्या देखिएको छ ।
यता, पूर्वी नवलपरासीको अरुणखोला दुम्कीबास सडक बगाउँदा पूर्वपश्चिम राजमार्गमा यातायात अवरुद्ध भएको छ । सोमबार रातिको बाढीले डाइभर्सन सडक बगाएका कारण अरुणखोलामा राजमार्ग बिहानबाट अबरुद्ध भएको हो ।
पूर्वपश्चिम राजमार्ग अन्तर्गत बुटवल–नारायणगढ खण्डको १ सय १४ किलोमिटर क्षेत्रमा सडक विस्तारको क्रममा करिब २ सय डाइभर्सन रहेको छ ।
यसैगरी, सोमवार रातिदेखि परेको अविरल वर्षासँगै आएको बाढी पहिरोले डुम्रे–बेँसीसहर सडक र बेँसीसहर–चामे सडक अवरुद्ध भएको छ ।
झापामा एक सय घर डुवानमा
सोमबार रातिदेखि परेको वर्षाका कारण झापाको कनकाई नदीमा पानीको बहाव बढेको छ । कन्काईको बाढीले करिब एक सय घर डुवानमा परेका छन् ।
इलाका प्रहरी कार्यालय शिवगञ्ज पूर्वको बस्ती डुवानमा कन्काई नदी पसेको छ । उनीहरूलाई सुरक्षित स्थानमा लैजाने तयारी छ।
मेची, निन्दा, बिरिङ, कनकाई, रतुवा लगायतका नदीमा पानीको सतह बढेको छ ।
