प्रेम प्रतीकको रुपमा रहेको फूलबारीभित्र राजा सलहेश र मालिनीको गहवर (मन्दिर) मा पूजाअर्चना गर्न र मन्दिरसँगै टाँसिएको हारम जातको रुखमा हरेक वर्ष नयाँ वर्षमा मात्र फुल्ने जनविश्वास छ ।
सन्तान प्राप्ति, चर्म रोगलगायतका रोगब्याधि नलाग्ने र तराईका पासवान जातिको इष्टदेव मानिने सलहेशको पूजा गर्नाले मनोकांक्षा पूरा हुने,जनविश्वास छ । भारतको बिहार, पश्चिम बंगाल, नेपालको सिरहा, सप्तरी, उदयपुर, धनुषालगायतका जिल्लाबाट हजारौंको संख्यामा दर्शनार्थीहरू फूलबारीभित्र दुर्लभ जातिका जडीबुटी खोज्न आउने गर्दछन् । हरेक वर्षको १ वैशाखमा मात्र पूजा हुने सलहेश फूलबारीमा भव्य मेलासमेत लाग्ने गर्दछ ।
सलहेश गाथामा उल्लेख गरिएअनुसार सोह्र शताब्दीको लोकनायक सलहेश र विराट राजाकी छोरी मालिनीबीच प्रगाढ प्रेम सम्बन्ध रहे पनि प्रेम असफल भएपछि सलहेशको प्रतीक्षा गर्दै मालिनी मालाको रूपमा १ वैशाखमा फुल्ने गरेको सलहेश गहवरका पुजारी हरिसिंहदेव दनुवारले बताए ।
कोरोना संक्रमणका कारण गत वर्ष १२ बिघा क्षेत्रफलमा फैलिएको सलहेश फुलबारी मेला नलागेकाले यस वर्ष विगतको तुलनामा मेला हेर्न आउनेहरुको संख्या बढ्न सक्ने अनुमान गरिएको छ ।
