काठमाडौं । श्री एयरलाइन्सको एउटा जहाज मंगलबार बिहान त्रिभुवन अन्तर्राष्ट्रिय विमानस्थलमा चिप्लिएको छ ।
विमानस्थलको पार्किङबाट रनवेतिर जाँदा चिप्लिएर घाँसतिर पुगेको हो । श्री एयरको उक्त विमान काठमाडौंबाट मंगलबार विहान नेपालगञ्ज जान लागेको थियो । उक्त जहाजमा कुनै पनि क्षति नभएको विमानस्थल स्रोतले जनाएको छ ।
श्री एयरलाइन्सका प्रबन्धक अनिल मानन्धरले जहाजमा यात्रु भए पनि कसैलाई चोटपटक नलागेको बताए ।
जहाज धावनमार्गमा नभएकाले अरू उडान प्रभावित नभएको विमानस्थल अधिकारीहरुले बताएका छन् ।