दुईदिने भ्रमणका लागि हिजाे बंगलादेशकाे राजधानी ढाका पुगेका भारतीय प्रधानमन्त्री नरेन्द्र मोदीकाे भ्रमणकाे विराेधमा चटगाँवमा प्रदर्शन भएकाे छ । त्यस क्रममा भएकाे झडपमा पाँच जनाकाे मृत्यु भएकाे बीबीसीले उल्लेख गरेकाे छ ।
ढाकामा पनि प्रदर्शन
मोदी भ्रमणकाे विरोधमा हिजाे ढाकाकाे बैतुल मुकर्रम क्षेत्रमा पनि विराेध प्रदर्शन भएकाे थियाे । यस क्रममा प्रहरी र प्रदर्शनकारीबीच झडप हुँदा कैयाैं पत्रकारसमेत घाइते भएका छन् ।
बंगलादेशी मिडियाकाे रिपाेर्टअनुसार चटगाँवमा जुमेकाे नमाजपछि हथाजरी मदरसेबाट विराेध मार्च निकालिएकाे थियाे, त्यसपछि हिंसक झडप भएकाे हाे । झडपमा प्रदर्शनकारीसँगै कैयाैं प्रहरी घाइते भएका छन् ।
केही दिनयता कतिपय मुस्लिम नेता र वामपन्थी संगठनहरू भारतीय प्रधानमन्त्री मोदीकाे बंगलादेश भ्रमणकाे विरोधमा र्यालीहरू निकालिरहेका थिए । उनीहरूकाे दाबीअनुसार शेख मुजीबुर रहमानले एक धर्मनिरपेक्ष राष्ट्रका लागि संघर्ष गरेका थिए, तर मोदी साम्प्रदायिक छन् ।
माेदी बंगलादेशी समकक्षी शेख हसिनाकाे निम्ता स्वीकार्दै हिजाे बंगलादेश गएका हुन् । उनी बंगलादेश स्वतन्त्रताकाे ५० वर्ष एवं संस्थापक शेख मुजीबुर रहमानकाे जन्मजयन्तिका अवसरमा आयोजित कार्यक्रममा सहभागी हुन त्यहाँ पुगेका हुन् ।
प्रकाशित मिति: शनिबार, चैत १४, २०७७, ०७:३७:००
